Чурапчы улууһун Арыылаах нэһилиэгин байанайдаах булчуттара нэһилиэк кырдьаҕас олохтоохторугар, соҕотох ийэлэргэ, Сааскы Ньукуолунунан дьиэлэри кэрийэ сылдьан кустары түҥэттилэр. Соһуччу кэһииттэн бары да олус үөрдүлэр, ис сүрэхтэриттэн махтаннылар. Нэһилиэк дьаһалтатын уонна эр дьонун көҕүлээһиннэринэн маннык үтүө үгэс үһүс сылын тэриллэр.
Нэһилиэк ытык кырдьаҕаһа, тыыл, үлэ бэтэрээнэ 89 саастаах Николай Титович Захаров “муннукка ытаабыт” байанайдаах булчут. Кытта кырдьыбыт кыдьыга батарбакка, саас, күһүн ахсын дугдатын, мончууктарын бэрийэн, эбэтигэр киирэн куска, андыга сытааччы. Кырдьаҕаһы, быйыл саас тыаллаах, тымныы күн-дьыл туран, чаҕытта. Ньукулай онтон санаатын түһэрбэт, аны андыга сыппыт киһи диэн баҕалаах. Ааспыт күһүн хаар түспүт, күөл мууһа тоҥмут кэмигэр байанайа киниэхэ анды өлүүлээбитэ.
Николай Титович 61 сыл бииргэ эн-мин дэһэн олорбут кэргэниниин Анна Алексеевналыын Ньукуолун күн кус миинин амсайар дьоро киэһэ тосхойбутунан, нэһилиэк дьаһалтатыгар, байанайдаах кусчуттарыгар үтүө санааларын иһин махтаналлар, байанайдара тосхойо турарыгар алгыстаах санааларын тиэрдэллэр.
Ааптар: Анна Захарова.