Аммаҕа халаан уута: Уу таһыма кыралаан түһэр, дьоҥҥо көмө оҥоһуллар

ВЕСТИ ЯКУТИИ // Онон Амма аннынан уу кыралаан түһэн эрэр. Ол эрээри уоскуйар табыллыбат. Буягаҕа уу таһыма улахан, онон иккис уу кэлиэн сөп. Сарсыарда 8 чаас туругунан, уу таһыма Амматааҕы гидропост этэринэн, 10 м.65 см., онтон Дьокуускайдааҕы гидрометсулууспа биэрэр дааннайынан 11 м. 15 см. Ол аата улууспут историятыгар буолбатах улахан уу кэллэ.

---

Улуус баһылыга Николай Архипов:

— Үс күн мууһу эһии түмүгэр муус хамсаан, Мээндиги уонна Соморсун аннынан хойуутук устар, Амма аннынан түһэн эрэр. Ууга барбыт нэһилиэктэр баһылыктарын кытта ыкса сибээскэ олоробут, барытын биллэрэ тураллар. Республикаттан кэлбит хамыыһыйа күүскэ үлэлии сылдьар. Хас биирдии сулууспа бэйэлэрин үлэлэрин дьаныардаахтык толороллор. Бүгүҥҥү туругунан, 196 ыал ууга баран олорор, 591 киһи ыалларынан көстүлэр.

Маны сэргэ быстах олорор сирдэр тэриллибиттэрэ. Ол курдук Аммаҕа 9, Чапчылҕаҥҥа 4 киһи бу пууннарга бааллар. Ууга барбыт дьоҥҥо бородуукта набуорун улуус дьаһалтатыгар түҥэтэ турабыт.  Күүстээх көмөнү улууспут предпринимателлэрэ оҥороллор. Иһэр ууну бэйэбит Аммабыт собуота оҥорор. Ону таһынан Майаттан КамаЗ массыынанан иһэр уу кэлэн, ону оскуолаларынан, оҕо саадтарынан тарҕаттыбыт. Уу өссө да турар. Уоскуйбаппыт. Онон өссө сомоҕолоһон, тулуйан ыарахан кэми аһарыахпытын наада. Уу ааспытын кэнниттэн эмсэҕэлээбиттэри барытын испииһэктээн көмө оҥоруута барыа. Ил Дархан Егор Афанасьевич Борисов кэлэн нэһилиэнньэни көрсөн боппуруостарга эппиэттээн, республика өртүттэн көмө баар буолуо диэн эттэ. Билигин тыа хаһаайыстыбатын салаатынан харчы кэлэн эрэр. Ону кытта пенсия, хамнас ууттан эмсэҕэлээбит нэһилиэктэргэ эрдэ төлөнөр.

Баһылык «бу улахан халаан уута аммаларга тургутууну ыытарын, онон бары биир күүс буоларбытын көрдөрөрбүтүгэр» ыҥырда.

Аны сайын атырдьах ыйыгар ыытыллыахтаах Оонньууларбыт туһунан этэр буоллахха, күүстээх бэлэмнэнии үлэтэ бара турарынан, дьон бу оонньуулары күүтэринэн, улахан тэрээһин буолуо диэн эттэ. Онон халаан уутун кэнниттэн тупсарыы үлэтигэр күүскэ ылсарбыт наада.

Ааптар: Наталья Бубякина